Аңыз 1: Өмірді сақтандыру қымбат, орта тапқа қолжетімсіз
Шындық: Полис құны әртүрлі факторға байланысты өзгереді. Мысалы, 5–10 жылдық қарапайым мерзімдік сақтандыру айтарлықтай арзан. Баға жасыңызға, денсаулығыңызға, қамту сомасына және мерзіміне қарай есептеледі. Бастау үшін шағын, бірақ маңызды қамтумен-ақ бюджетке лайық нұсқа табуға болады.
Аңыз 2: Сақтандыру компаниялары төлемеу үшін түрлі себеп ойлап табады
Шындық: Заңды негізсіз төлемеулер – сақтандыру компаниясы үшін үлкен беделдік тәуекел және Қазақстан Ұлттық Банкінің қадағалауын тудырады. Әдетте төлемнен бас тарту шартты бұзған жағдайда (ақпаратты жасырған, ерекшеліктерге кіретін жағдайға түскен кезде) орын алады. Жауапты компаниялар төлем жасауға мүдделі, себебі ол нарықтағы сенімділікті арттырады.
Аңыз 3: Бұл босқа ақша шығындау, ақшаны депозитке салған дұрыс
Шындық: Бұл екі түрлі қаржылық құрал және бірін-бірі алмастырмайды, тек толықтырады.
-
Депозит – жинақ пен шағын табыс үшін.
-
Өмірді сақтандыру – ең алдымен қорғау үшін.
Ертең сізге бір жағдай болса, депозит отбасыңызға миллион теңге бермейді. Ал сақтандыру береді.
Аңыз 4: Мен жаспын/денсаулығым мықты, сақтандырудың қажеті жоқ
Шындық: Жас шақ пен жақсы денсаулық – полис алудың ең тиімді уақыты. Біріншіден, жарналар әлдеқайда төмен болады. Екіншіден, ешкім жазатайым оқиғадан сақтандырылмаған. Өмірді сақтандыру – жауапкершілік пен жақындарыңызға бүгіннен бастап қамқорлық көрсету.
Аңыз 5: Егер ештеңе болмаса, барлық ақша жоғалады
Шындық: Бұл тек классикалық тәуекелді сақтандыруға қатысты. Қазір жинақтаушы бағдарламалар бар. Онда сіз белгілі бір мерзімде жарна төлейсіз, ал мерзім соңында барлық жинақталған соманы инвестициялық табыспен бірге аласыз, сақтандыру жағдайы болса да, болмаса да.
Өмірді сақтандыру – лотерея емес, қаржылық тәуекелдерді басқару құралы. Бұл – болашағыңызды ойлау мен отбасыңызға қамқорлық жасаудың белгісі. Дұрыс таңдалған полис – қаржылық тұрақтылығыңыздың берік негізі бола алады.
Шарт жасамас бұрын тәуелсіз қаржылық кеңесшімен немесе бірнеше сақтандыру компаниясының өкілімен кеңесіп, өзіңізге тиімді шешімді табыңыз.
Дереккөз: ABC News
Фотосурет ашық дереккөздерден алынған
