Бұл туралы Set for Life Insurance президенті Джейми Флейшнер Finding Financial Freedom подкастында айтты.
«Менің тәжірибемде, шамамен әр үшінші дәрігер СДВГ-ға қарсы препараттар, антидепрессанттар немесе СИОЗС қабылдайды. Егер өтініш беру кезінде мұндай дәрілерді қабылдап жүрсеңіз, сақтандырушы әдетте полиске шектеу енгізеді», – дейді 30 жылдан астам уақыт бойы дәрігерлерді сақтандыру саласында жұмыс істеп келе жатқан Флейшнер.
The Wall Street Journal деректеріне сүйенсек, еңбекке жарамсыздық сақтандыру компаниялары психикалық диагноздар бойынша өтемақы төлеуден басқа ауруларға қарағанда 33% жиі бас тартады.
Шектеулер, әсіресе, реаниматологтар, анестезиологтар, стоматологтар және анестезист-мейірбикелер (CRNA) үшін қатаң – психикалық ауруларға байланысты төлем мерзімі жиі екі жылмен шектеледі. Калифорния штатында мұндай шектеулер әр полисте бар.
Кірісті сақтандырудағы олқылықтар
Психикалық жағдайларға байланысты ерекшеліктер, әсіресе, жоғары стрессті салада жұмыс істейтін дәрігерлер үшін қауіпті. Мысалы, отбасының негізгі асыраушысы болып отырған хирург немесе анестезиолог психикалық ауру себебінен ұзақ демалысқа шықса, табыссыз қалуы мүмкін.
«Бұл жай ғана төлем көлемін қысқарту емес, – деп түсіндіреді Флейшнер. – Бұл сіз психикалық диагнозға байланысты жұмыс істей алмасаңыз, төлем мүлдем болмайды деген сөз. Ал тұрақты табысқа тәуелді дәрігер үшін бұл – үлкен қауіп».
Флейшнердің айтуынша, көптеген дәрігерлер полистегі психикалық және неврологиялық ауруларды шатастырады: «Кейбіреулер Альцгеймер немесе склероз кезінде төлем болмайды деп ойлайды. Бұл қате. Бұл диагноздар неврологиялық ауруларға жатады және сақтандырумен қамтылады. Шектеулер тек психикалық ауруларға қатысты».
Психикалық денсаулыққа қатысты ерекшеліктер медициналық андеррайтинг кезінде енгізіледі:
Антидепрессанттарды бір рет қабылдау немесе психотерапевтке бару фактісі де автоматты түрде шектеу қоюға жеткілікті.
«Бұрын жағдай тіпті нашар еді, – дейді Флейшнер. – 10–15 жыл бұрын депрессиядан емделген адамға полис мүлде берілмейтін. Қазір беретін болды, бірақ шектеулермен. Ілгерілеу бар, бірақ әлі де психикалық денсаулығына қамқорлық жасайтын адамдар жазаға ұшырап отыр».
Дереккөз: Manila Times
Сурет ашық дереккөздерден алынды
