Таиландтың Өмірді сақтандыру қауымдастығының (TLAA) мәліметінше, 2026 жылы өмірді сақтандыру бойынша сақтандыру сыйлықақылары 2,5–3,5%-ға өсіп, 700 млрд батқа (шамамен 10,4 трлн теңге) жетеді деп күтілуде. Бұл 2025 жылғы 677 млрд батпен (шамамен 10,1 трлн теңге) салыстырғанда жоғары көрсеткіш. Ал Таиландтың Жалпы сақтандыру қауымдастығы сақтандырудың өзге түрлері бойынша сыйлықақылар көлемі 300 млрд батты (шамамен 4,5 трлн теңге) құрайды деп болжап отыр. Осылайша, сақтандыру саласы тарихи межеге жетуге жақын.
Нарықтағы өсімнің негізгі қозғаушы күші бұрынғысынша денсаулық сақтау мен жинақтауға бағытталған сақтандыру өнімдері болып отыр. Медициналық қызметтердің қымбаттауы және жыл сайынғы 8–10% деңгейіндегі медициналық инфляция жағдайында тұтынушылар қаржылық қорғанысқа басымдық беруде.
2026 жылы медициналық сақтандыру және ауыр дерттерден сақтандыру нарығының көлемі шамамен 120 млрд батқа (шамамен 1,8 трлн теңге) жетіп, 10%-дан астамға өседі деп күтілуде. Өмірді сақтандыру сегментінде дәстүрлі өмірді сақтандыру полистері мен қосымша медициналық сақтандыру полистері көш бастап тұр. Сонымен қатар инвестициялық қорлармен байланысты сақтандыру өнімдері мен аннуитеттер екі таңбалы тұрақты өсімді көрсетіп, халықтың қаржылық қорғаныс пен капитал жинақтауға деген сұранысын айқындауда.
Қаржылық көрсеткіштер де жақсаруда. Болжам бойынша, 2025 жылы өмірді сақтандыру секторының таза пайдасы 74,89 млрд батты (шамамен 1,1 трлн теңге) құрайды. Бұған сақтандыру қызметінен түсетін кірістің артуы және инвестициялық табыстың өсуі әсер етеді. Сондай-ақ сала активтері 4,49 трлн батқа (шамамен 67 трлн теңге) жетеді деп күтілуде. Активтер портфелінің басым бөлігін мемлекеттік облигациялар құрайды.
Фото ашық дереккөздерден.
