Инфляцияның жеделдеуі мен базалық мөлшерлеменің өсуі жалпы инфляциялық жағдайға әсер етіп, нарықтағы «инфляциялық ойлауды» күшейтті. Осындай кезеңде түсінікті табыстылық пен капиталды қорғауды ұсынатын құралдарға сұраныс — толықтай негізді.
USD/KZT бағамының құбылуы аясында валюталық индексациясы бар жинақтаушы сақтандыру бағдарламаларына қызығушылық артып келеді. Көптеген сақтандыру компаниялары осы сұранысқа жауап беріп, өз өнімдерін ұсынып жатыр.
«Соңғы жылдары Қазақстандағы өмірді сақтандыру нарығы тұрақты өсім көрсетіп келеді: ҚР Ұлттық банкінің деректеріне сәйкес, 2025 жылдың 1 қыркүйегіне дейінгі сақтандыру сыйлықақыларының көлемі 673,7 млрд теңгеге жетті, бұл 2024 жылдың сәйкес кезеңімен салыстырғанда 15,3% көп; 2021 жылдан бері сыйлықақылар көлемі 174,4%-ға өсті, – деп нақтылайды КСЖ “ГАК” басқарма төрағасы Қуаныш Мұкажанов. – Сақтандыру бағдарламаларының әртараптандырылуы мен оларды онлайн ресімдеу мүмкіндігі нарықтың турбулентті жағдайда да өсуіне ықпал етіп отыр».
Соңғы жылдары жинақтаушы өмірді сақтандыруға деген қызығушылық айтарлықтай артты. Көптеген клиенттер үшін бұл — отбасы қауіпсіздігін, капитал жинауды, белгіленген табыстылықты және валюталық индексацияны біріктіретін құрал. «Инфляцияның өсуі мен валюта бағамының құбылуы сұраныс құрылымына әсер етеді: клиенттер ұзақ мерзімді кезеңде қаражатты сақтауға және көбейтуге мүмкіндік беретін жинақтаушы бағдарламаларды жиі таңдайды», — деп хабарлайды Freedom Life баспасөз қызметі.
Пенсиялық аннуитет бағыты бойынша КСЖ «Евразия» 2025 жылдың алғашқы 8 айында сақтандыру сыйлықақыларын тарту өсімінің 100%-дан жоғары деңгейін тіркеді. Бұл — нарықтағы ең жоғары көрсеткіш. Аннуитет келісімін жасаудың басты себептерінің бірі — БЖЗҚ-дағы қаражатты бүгін пайдалану мүмкіндігі болды. Өйткені жоғары инфляция жағдайында жинақтардың сатып алу қабілетінің сақталуына деген сенім төмендеп барады. «Жинақтаушы сақтандыру сегментінде біз клиенттердің сұранысы доллар бағамына индексациясы бар бағдарламаларға қарай ауысқанын байқап отырмыз», — дейді КСЖ «Евразия» сату және өңірлік даму департаментінің директоры Рамай Құрбанғалиев.
КСЖ «BCC Life» 2024 жылдың соңында жұмысын бастағандықтан, компания әзірге өз статистикасына сүйеніп нақты қорытынды жасауға ерте деп санайды. «Алайда нарықты жалпы қарасақ, жоғары инфляция мен теңге бағамының тұрақсыздығы жинақтаушы сақтандыру өнімдеріне сұранысты белгілі бір деңгейде тежеп отыр. Қысқа мерзімді немесе икемдірек шешімдерге қызығушылық артып келеді. Клиенттер нәтижені тезірек көру немесе өтімділікті сақтау мүмкіндігіне мән береді. Бірақ тәуекелдік (сақтандыру) бағдарламаларына деген базалық сұраныс тұрақты», – дейді КСЖ «BCC Life» басқарма мүшесі Мұхтар Көптілеуов.
Қиын жағдайдағы бейімделу
Спикер КСЖ «BCC Life» инвестициялық саясаты активтер мен міндеттемелердің мерзімі, валютасы және табыстылығы бойынша барынша сәйкестік қағидатына негізделгенін айтты. Компанияның басты мақсаты — клиенттер алдындағы міндеттемелерді орындау, жоғары табыстылықты қуу емес. «Біз активтерді басқаруда консервативті тәсілді ұстанамыз: басымдық — сенімді әрі төмен тәуекелді құралдар, яғни мемлекеттік бағалы қағаздар мен жоғары кредиттік рейтингі бар эмитенттердің облигацияларында», — деп атап өтті Мұхтар Көптілеуов.
Инфляцияның өсуіне байланысты Қазақстан Ұлттық банкі базалық мөлшерлемені 18%-ға дейін көтерді. Осылайша мемлекет елдегі баға өсімін шектеу құралдарын іске қосты. «Бұл еліміздегі бағалы қағаздар мен депозиттердің табыстылығы өседі деген сөз. Біздің нарықта НБ РК базалық мөлшерлемесін көтергеннен кейін МБҚ және корпоративтік облигациялар табыстылығының артқанын байқап отырмыз. Сенімділік біз үшін негізгі басымдық болып қала береді, сондықтан активтерді басқаруда консервативті саясатты жалғастырып, қаражатты ұлттық валютада номинирленген құралдарға инвестициялай береміз», — деді КСЖ «Евразия» басқарушы директоры Любовь Ли.
КСЖ «ГАК» базалық мөлшерлеменің қазіргі деңгейі активтерді орналастыруда бір жағынан жоғары табыстылыққа мүмкіндік беретінін, екінші жағынан корпоративтік қарыз алу нарығын айтарлықтай тарылтып тұрғанын айтады. «Біздің компания қалыпты консервативті инвестициялық саясатты ұстануды жалғастырады. (…) Портфельдің негізін ұлттық валютада номинирленген құралдар құрайды. Сонымен қатар АҚШ долларында номинирленген Demeu жинақтаушы сақтандыру өніміне сұраныстың артуына байланысты валюталық активтердің үлесі де өсетін болады», — деп атап өтті КСЖ «ГАК» басқарма төрағасы.
Freedom Life макроэкономикалық көрсеткіштердің және пайыздық мөлшерлемелердің өзгеруіне қарай активтерді орналастыру стратегиясын тұрақты түрде қайта қарап отырады, бұл компанияға табыстылық пен тәуекел арасындағы оңтайлы теңгерімді сақтауға мүмкіндік береді.
«Біздің портфельдің негізін тәуекелі төмен және тұрақты табыс әкелетін мемлекеттік және квазимемлекеттік облигациялар құрайды. Мұндай тәсіл компанияға экономикалық белгісіздік кезеңінде де қаржылық орнықтылықты сақтауға және клиенттер алдындағы міндеттемелерді толық орындауға мүмкіндік береді», — деп қорытындылады компанияның баспасөз қызметі.
Қорытындылай келе, жоғары инфляция мен ұлттық валютаның құбылмалылығы жағдайында Қазақстанның сақтандыру компаниялары клиенттердің капиталды қорғау және көбейтуге бағытталған өсіп келе жатқан сұранысына жауап ретінде өз ұсыныстарын бейімдеп келеді.
