Жаңа орталық технологияларды практикалық қолдануға басымдық береді. AI COE мамандары төрт негізгі бағытта шешімдер әзірлеу және оларды ауқымдау бойынша жұмыс істейді: тәуекелдерді бағалауды автоматтандыру және оның дәлдігін арттыру, тиімділікті көтеру үшін ішкі процестерді оңтайландыру, неғұрлым дербестендірілген әрі жедел сервисті қалыптастыру, сондай-ақ агенттер мен серіктестерді заманауи жұмыс құралдарымен қамтамасыз ету.
Жобаны іске асырушылар сақтандыру өнімдері мен қызметтерін клиенттер үшін қолжетімді, қарапайым және интуитивті етуді көздейді. Күтілетін жақсартулар қатарында — дербестендірілген кеңестер, зияткерлік ұсынымдар және өтініштерді өңдеу уақытының қысқаруы бар. Сонымен бірге компания технологиялар адамдарды алмастыру үшін емес, керісінше, қызметкерлер мен қаржылық кеңесшілерге қуатты құралдар ұсына отырып, «адамдық тәжірибені байыту» үшін қолданылатынын атап өтті.
Сараптаманы күшейту мақсатында Manulife Singapore Сингапур ұлттық университеті (NUS) жанындағы Азиялық цифрлық қаржы институтымен (AIDF) стратегиялық серіктестік орнатты. Бірлескен жұмыс InsurTech саласындағы зерттеу жобаларын және деректерді жауапты пайдалану бағытында білім алмасуды қамтиды.
«Жасанды интеллект бойынша озық тәжірибе орталығының ашылуы — біздің цифрлық трансформациямыздағы маңызды кезең. Біз ЖИ-ді жауапты әрі инновациялық қолдану бизнес-процестерді оңтайландыруға ғана емес, ең алдымен, Сингапурдағы клиенттерімізге олардың қажеттіліктерін алдын ала болжайтын мүлде жаңа сервис деңгейін ұсынуға мүмкіндік беретініне сенеміз», — деді Manulife Singapore бас атқарушы директоры Крис Гамильтон.
Фото ашық дереккөздерден алынған
