Жақында Чираг Ратход AIA компаниясының Гонконгтағы бөлімшесінде ауқатты клиенттерге (high-net-worth) қызмет көрсету жөніндегі жаһандық бизнестің бас директоры қызметіне кірісті. Бұл – осы бағытты дамыту мақсатында арнайы құрылған жаңа лауазым. Ал Prudential осы айда Донна Коттерді әл-ауқатты басқару және Бермуд бағыты бойынша бас директор қызметіне тағайындады. Бұл да компаниядағы жаңа қызмет.
Өсімнің негізгі факторлары
Кадрлық өзгерістер француздық AXA сақтандыру тобының осы айда жаңа платформаны іске қосуымен тұспа-тұс келді. Платформа ауқатты клиенттерге сақтандыру полистерін Гонконг пен Бермуд аралдарындағы кеңселері арқылы сатып алуға мүмкіндік береді.
AXA Greater China және жеке капиталмен жұмыс істейтін жаңа бөлімшенің бас директоры Салли Ван маусым айындағы брифингте компания бастапқы кезеңде Азия клиенттеріне басымдық беретінін, кейін платформаны басқа нарықтарға да кеңейтуді жоспарлап отырғанын айтты.
Сақтандырушылардың Азиядағы белсенділігінің артуына бірнеше фактор әсер етуде. Ауқатты клиенттердің капиталы Гонконг пен Сингапурға бағытталуда, Қытайдың материктік бөлігіндегі инвесторлар жоғары кірістілік іздеуде, ал геосаяси шиеленістің күшеюі активтерді қорғауға деген сұранысты арттыруда.
Reimagine Risk компаниясының негізін қалаушы әрі бас директоры Джейсон Эллейннің айтуынша, геосаяси тәуекелдердің өсуі инвестициялық белгісіздікті күшейтіп, долларлық облигациялар сияқты кейбір активтерге қатысты алаңдаушылықты арттыруы мүмкін. Бұл сақтандырушыларға индекстелген әмбебап өмірді сақтандыру (indexed universal life) сияқты балама сақтандыру өнімдерін ұсынуға мүмкіндік береді.
Өткен жылы Гонконгтың реттеушілік талаптарды жеңілдетуі ауқатты клиенттерге ақшалай құнының бір бөлігі қор нарығы индексіне байланыстырылған сақтандыру полистеріне қол жеткізуге жол ашты. Бұл шешім осындай өнімдерге деген сұранысты одан әрі күшейтті.
Сонымен қатар бұл кеңею Қытайдың трансшекаралық капитал қозғалысын бақылауды күшейтуі аясында жүзеге асып жатыр. Соңғы апталарда AIA мен Prudential акциялары осы шаралар олардың негізгі бизнесіне — Қытайдың материктік бөлігінен келетін клиенттерге сақтандыру өнімдерін сатуға кері әсер етуі мүмкін деген алаңдаушылыққа байланысты төмендеді. Алайда соңғы күндері акциялар бағасы ішінара қалпына келе бастады.
Рекордтық көрсеткіштерге ұмтылыс
Компаниялар сақтандыру сыйлықақылары бойынша рекорд орнатқан нарық көшбасшыларын қуып жетуге тырысуда.
Биыл Manulife Financial Сингапурда құны 300 миллион АҚШ долларын құрайтын өмірді сақтандыру полисін сатты. Осылайша компания HSBC Life-тың 2024 жылы Гонконгта орнатқан 250 миллион АҚШ долларлық рекордын жаңартты.
2025 жылы AIA да, Prudential де Гонконг пен Қытай тарапынан жоғары сұраныстың арқасында жаңа келісімдерден түсетін табыстың артқанын хабарлады.
Гонконгта AIA жаңа бизнес құнының 16%-ға өскенін мәлімдеді. Бұған жергілікті тұрғындармен қатар Қытайдың материктік бөлігінен келген келушілерге жасалған сатылымдар ықпал етті.
Ал Prudential 2025 жылы операциялық пайдасының 51,3%-ға артқанын жариялады.
Сонымен қатар AXA өмірді сақтандырумен қатар сән-салтанат бұйымдарын, өнер туындылары топтамаларын сақтандыру, сондай-ақ адам ұрлау мен кепілге алу тәуекелдерінен қорғау бойынша өнімдер мен консультациялық қызметтер көрсетуді жоспарлап отыр.
Фото ашық дереккөздерден.
