Линн округіне жолданған айыптау қорытындысына сәйкес, Нагбе жұмыс берушісі арқылы балаларына сақтандыру полистерін рәсімдеген. Алғашқы оқиға 2024 жылғы 6 мамырда болған. Ол қызы Комфорт Нагбе Либерияда мотоцикл апатынан қаза тапты деп мәлімдеп, қайтыс болуына байланысты 30 000 доллар көлемінде төлем алуға өтініш берген. Өтініш мақұлданып, бір айдан кейін қаражат Нагбенің шотына түскен.
Алайда бір жылдан соң, 2025 жылғы 10 маусымда, ол осы схеманы қайта қолдануға тырысқан. Бұл жолы Нагбе егіз балалары Гифти мен Виктор Нагбенің жол-көлік оқиғасынан көз жұмғанын айтып, сақтандыру төлемін талап еткен.
Алайда сақтандыру компаниялары күмәндана бастаған. Айова штатының Сақтандыру және қаржылық қызметтер департаментіне қарасты алаяқтықпен күрес бюросының мәліметінше, жүргізілген тергеу барысында аталған өлім жағдайларының ешқайсысы расталмағаны белгілі болды. Нагбе ұсынған үш баланың да өлім туралы куәліктері жалған болып шыққан.
Сонымен қатар тергеушілер Нагбенің жауап алу кезінде балалардың қаза болу мән-жайына қатысты бірнеше рет бір-біріне қайшы келетін түсініктемелер бергенін атап өтті. Нәтижесінде егіз балаларға қатысты берілген екінші өтініш бойынша сақтандыру төлемі жасалмаған.
Қазіргі уақытта оған аса ауыр айыптар тағылып отыр: бірінші дәрежелі ұрлық (С санатындағы ауыр қылмыс) және жалған ақпарат ұсыну арқылы жасалған екі сақтандыру алаяқтығы фактісі (D санатындағы ауыр қылмыстар).
Тағылған айыптардың ауырлығына қарамастан, Нагбе бостандыққа шыға алған. Сот құжаттарына сәйкес, бейсенбі күні ол 20 000 доллар көлемінде кепілдік жарнасын төлеп, Линн округінің түрмесінен босатылған.
Дереккөз: The Gazette
Фото ашық дереккөздерден алынды.
