Freedom Life АҚ басқарма төрағасы Азамат Ердесовтің пікірінше, 2026 жыл қаржы ұйымдары үшін экологиялық, әлеуметтік және басқарушылық (ESG) стандарттар анағұрлым айқын әрі міндетті сипатқа ие болатын кезеңге айналуы мүмкін. Бұл үрдіс жаңартылған мемлекеттік жол картасымен қолдау табуда.
Freedom Life үшін бұл бағыт жаңа емес. Компания бірнеше жылдан бері осы салада бірқатар жобаларды жүзеге асырып келеді, соның ішінде:
– балалардың қаржылық сауаттылығын арттыруға арналған Freedom Camp білім беру жобасы (11 мыңнан астам оқушы қамтылған);
– Қонаев қаласындағы жағалауды жаңарту сияқты инфрақұрылымдық бастамалар;
– Mecenat.kz сыйлығын қоса алғанда, мәдениет пен спортты қолдау, сондай-ақ Oceanman Kazakhstan сынды іс-шараларды сақтандырумен сүйемелдеу.
Екінші маңызды тренд — онлайн-арналардың белсенді дамуы. 2026 жылы цифрлық өнімдер желісін кеңейту және бұрын тек офлайн форматта рәсімделген бағдарламаларды (мысалы, зейнетақы аннуитеттері) онлайн форматқа көшіру күтіледі.
Инвестициялық құрамдаспен сақтандыру қорғанысын біріктіретін unit-linked типтес өнімдерге ерекше назар аударылуда. Мұндай өнімдердің жаһандық нарығы қарқынды өсіп келеді, ал қазақстандық компаниялар бұл бағытты белсенді түрде дамытуды жоспарлап отыр.
КСЖ Nomad Life басқарма төрағасының орынбасары Елена Тайтуголева 2025 жылы тұтынушылардың құқықтарын қорғауға бағытталған маңызды реттеушілік өзгерістер бекітілгенін атап өтті. Бұл өзгерістердің толық әсері 2026 жылы көрініс табады.
Негізгі жаңашылдықтардың қатарына мыналар жатады: өнімдерді әзірлеу кезінде клиенттер типологиясын ескеру, клиенттердің қанағаттану коэффициентін енгізу, өтініштерді қараудың шекті мерзімдерін бекіту, мүгедектігі бар адамдар мен халықтың аз қимылдайтын топтары үшін қызметтердің қолжетімділігін міндетті түрде қамтамасыз ету (бұл талап 2026 жылғы шілдеден бастап күшіне енеді).
Аталған өзгерістер Қазақстанның бүкіл сақтандыру нарығында ашықтықты, адалдықты және клиентке бағдарлануды арттыруға бағытталған.
Дереккөз: Kapital.kz
Фото: ашық дереккөздерден
