2022 жылғы тамызда азық-түлік тауарларының бағасы өткен жылғы тамызбен салыстырғанда 20,8%-ға өсті, азық-түлікке жатпайтын тауарларға 15,5%-ға, ақылы қызметтерге 10,1%-ға көтерілді.
Азық-түлік нарығында жылдық мәнде баға айтарлықтай құмшекерге – 92,8%, басты пиязға – 46,9%, ұнға 41,4% өсті. Қызылша бағасы 12,4%, сәбіз 11,6% төмендеді.
Тамызда азық-түлікке жатпайтын тауарлардың баға өсімі 15,5% құрады. Баға деңгейі кеңсе тауарларына – 60,5%, мектеп сөмкесі, оқушылар рюкзагына – 44%, жеке қолданылатын тауарларға – 28,4%, жуу және тазалау заттарына – 26,6%, тұрмыс құралдарына – 24,2%, құрылыс материалдарына – 20%, балалар аяқ киіміне – 19,6% өсті.
Бір жылда ақылы қызметтер бағасы 10,1% өсті.
«Бюро ай сайын инфляция деңгейін сипаттайтын тұтыну бағалары индексінің көрсеткішін есептейді. Біз жалпы алғанда 508 позиция бойынша қызметтер мен тауарлардың тарифтер мен баға өзгерісін бақылаймыз», – деп ақпарат берді Бюроның баға статистикасы департаментінің директоры Қуанышбек Жақыпбекұлы.
