Аталған қосымша шеңберінде Қаржы орталығы (МЖБЖ операторы) ағымдағы жылы 5 жасқа толатын әрбір бала үшін мемлекеттік бюджет қаражаты есебінен бастапқы білім беру капиталының (ББК) есептелуін жүзеге асырады. Биылғы жылы ББК мөлшері 60 АЕК-ті (235 920 теңге), ал жетім балалар мен ата-анасының қамқорлығынсыз қалған балалар үшін — 120 АЕК-ті (471 840 теңге) құрайды.
«Бұл жаңашылдық қазақстандық балалардың білім алуына арналған жинақтау шарттарын жақсартып, ата-аналар тарапынан жинақтардың өсуіне қосымша көздер — “Ұлттық қор – балаларға” бағдарламасы аясында бөлінетін қаражат пен мемлекеттік бюджеттен төленетін бастапқы білім беру капиталы есебінен серпін беруге бағытталған. Мұның барлығы МЖБЖ аясында жасалатын салым және сақтандыру шарттары бойынша есептелетін мемлекеттік сыйлықақымен бірге Қазақстан азаматтары болып табылатын балалардың жоғары және орта кәсіптік білім алуына жеткілікті деңгейде қаражат жинақтауды қамтамасыз етуге тиіс», — деп түсіндіреді Nomad Life ӨСК-де.
Маңызды қадамдардың бірі — Сақтандыру төлемдеріне кепілдік беру қорының кепілдіктерін жинақтаушы өмірді сақтандырудың барлық түріне кеңейту туралы заңның қабылдануы болды. Бұған дейін кепілдік тетігі тек зейнетақы аннуитеттеріне ғана қолданылса, енді дәл осындай қорғау жинақтаушы сақтандыру шарттарына да беріледі. Бұл шешім халықтың сақтандыру жүйесіне деген сенімін айтарлықтай арттырып, клиенттердің шарттардың сенімділігі мен төлемдердің кепілдігіне деген сенімін нығайтады.
«Мемлекеттік саясаттың маңызды бағыты ретінде ESG-дің әлеуметтік құрамдас бөлігі болып табылатын халықтың қаржылық сауаттылығын дамыту да өзектілігін сақтап отыр. Білім беру бастамаларын одан әрі қолдау азаматтардың қаржылық қорғау мен ұзақмерзімді жоспарлау мәселелеріне саналы түрде қарауына ықпал етіп, бұл өз кезегінде бүкіл өмірді сақтандыру саласының дамуына оң әсерін тигізеді», — деп нақтылайды Freedom Life ӨСК басқарма төрағасы Азамат Ердесов.
Сонымен қатар, 2025 жылы сақтандыру секторындағы тәуекелдерді басқару жүйесіне қойылатын талаптарға қатысты бірқатар өзгерістер енгізілді. Олардың негізгі бағыттары мыналар:
-
сақтандыру ұйымдарындағы корпоративтік басқаруды күшейту;
-
сақтандыру өнімдерін әзірлеу кезінде клиенттер типологиясын ескеру;
-
сақтандыру өнімдерінің клиентке бағдарлануын арттыру;
-
клиенттердің сақтандыру өнімдерінің шарттарына қанағаттану коэффициентін енгізу;
-
сақтандыру нарығында адал мінез-құлық жүйесін дамыту;
-
клиенттерді қолдау қызметтерін құру.
«Бұл ұсыныстардың барлығы Тұтынушылардың құқықтарын қорғау мақсатында ҚНРДА тарапынан бастамаланған. Олар жеке тұлға-тұтынушылар үшін сақтандыру шарттарын жақсартуға және халықтың қаржылық сауаттылығын арттыруға бағытталған. Биыл сақтандыру ұйымдары осы талаптарды енгізумен және әр компанияның бизнес ерекшеліктеріне бейімдеумен айналысты», — деп атап өтеді Nomad Life ӨСК-де.
2026 жылғы сұраныс пен ұсыныс
BCC Life ӨСК пікірінше, келесі жылы Қазақстанда жинақтаушы сақтандыру өнімдеріне деген сұраныс құрылымы өзгереді. Бұл өзгерістер бірнеше факторға байланысты: халықтың қаржылық сауаттылығының артуы, ұзақмерзімді жинақтарға деген көзқарастың өзгеруі және сақтандыру қорғауы мен инвестициялау мүмкіндігін біріктіретін жинақтаушы сақтандыру өнімдеріне деген сенімнің күшеюі. Әңгіме unit-linked форматындағы өнімдер туралы, мұнда жарналардың бір бөлігі акциялар, облигациялар немесе биржалық қорлар (ETF) сияқты қаржы құралдарына инвестициялануы мүмкін.
«Соңғы жылдары адамдар тек ақшаны сақтап қалу туралы емес, жинақтарының жұмыс істеп, табыс әкелуі жайында жиі ойлай бастады. Инфляция жағдайында классикалық “жай ғана жинақтау” әрдайым жеткілікті шешім ретінде қабылданбайды. Сондықтан клиенттер бекітілген кірістілігі бар дәстүрлі өнімдерге қарағанда инвестициялық әлеуеті бар жинақтаушы бағдарламаларды жиі таңдайтын болады», — дейді BCC Life ӨСК басқарма мүшесі Талғат Дүйсебаев.
Сақтандырушылар 2026 жылы жинақтаушы сақтандыру өнімдеріне, әсіресе «екі міндетті қатар атқаратын» — отбасыны қорғап, ұзақмерзімді жинақтауды қамтамасыз ететін бағдарламаларға қызығушылықтың одан әрі өсетінін күтуде. Негізгі драйверлер — қаржылық сауаттылықтың артуы, ұзақмерзімді инвестицияларға қызығушылықтың күшеюі және экономикалық тұрақсыздық аясында отбасылардың қаржылық қауіпсіздік жастығын қалыптастыруға ұмтылысы.
«Мемлекеттік білім беру-жинақтаушы жүйе (МЖБЖ) қарқын алуда. 2025 жылы алғаш рет мемлекеттік сыйлықақы төленді: МЖБЖ аясында жұмыс істейтін бағдарламалар бойынша клиенттердің жинақтары мемлекеттік бюджет қаражаты есебінен 5–7%-ға ұлғайтылды. Сондай-ақ 6 жасқа дейінгі балалардың пайдасына қаражат жинайтын клиенттерге 60 АЕК мөлшерінде бастапқы білім беру капиталы төленді. Біз, “Еуразия” ӨСК-де, МЖБЖ-ға деген мақсатты аудиторияның қызығушылығының артқанын байқап отырмыз және балалардың пайдасына жинақтаушы өмірді сақтандыруға сұраныстың ауысуын болжап отырмыз», — деп нақтылайды “Еуразия” ӨСК сату және өңірлік даму департаментінің директоры Рамай Курбангалиев.
Азамат Ердесов сұранысқа валюталық күтулер де әсер етуі мүмкін деп санайды. ҚР Ұлттық банкінің сауалнамасына сәйкес, 2026 жылы АҚШ долларының теңгеге шаққандағы бағамы 548 теңгеге дейін өсуі, ал 2027 жылы 565 теңгеге жақындауы мүмкін. Ал кейбір сарапшылар 2026 жылы доллар бағамы 600 теңгеге дейін жетуі ықтимал деген сценарийді де қарастыруда.
«Мұндай жағдайда доллар бағамына байланған және шетел валютасында жоғары жылдық сыйақы мөлшерлемесі бар жинақтаушы өмірді сақтандыру бағдарламаларына (ЖӨС) деген қызығушылық айтарлықтай артады. Көптеген клиенттер үшін мұндай бағдарламалар жай ғана сақтандыру емес, капиталды сақтау және көбейту құралы ретінде қабылдана бастайды — кей жағдайда банктердегі валюталық салымдарға қарағанда әлдеқайда тиімді. Мысалы, Freedom Capital бағдарламасы бойынша сыйақы мөлшерлемесі доллармен 4,73%-ға дейін жетеді», — деп атап өтеді спикер.
Жаңа өнімдер
Unit-linked және гибридті сақтандыру өнімдерін енгізу нарық дамуының келесі толқыны ретінде қарастырылуда — бұл жинақтау мен инвестицияны біріктіріп, инвестициялық портфельді басқаруға қатысу мүмкіндігін береді.
«Мұндай өнімдер, ең алдымен, тек базалық сақтандыру қорғанысын емес, кірістілік пен жинақтардың икемділігін қатар алғысы келетін клиенттерге бағытталады. Инвестициялық стратегияны реттеуге мүмкіндік беретін, тәуекел мен кірістіліктің әртүрлі деңгейлерін көздейтін сақтандыру өнімдерінің пайда болуы есебінен өнім желісінің кеңеюі күтіледі. Сонымен қатар нарықта жұмыс істейтін азаматтардың зейнетақы активтерін жинақтаушы сақтандырумен біріктіру мүмкіндігі талқылануда, бұл халықтың зейнетақы жинақтарына қатысты өсіп келе жатқан үміттеріне жауап болып табылады», — деп бөліседі BCC Life ӨСК басқарма мүшесі.
“Еуразия” ӨСК жоспарында жинақтаушы сақтандыру бағдарламаларының қосымша сақтандыру жабындарын ішінара жетілдіру ғана бар, ал өнімдердің негізгі жұмыс механикасы айтарлықтай өзгермейді. «2026 жылы біз негізінен бизнес-процестерді автоматтандыру арқылы сервистің сапасын арттыруға назар аударамыз. Біздің мақсатымыз — қазақстандықтарға қаржылық жоспарлаудағы ең маңызды міндеттерін жылдам әрі сенімді шешу үшін шарттарды “екі кликте” жасасу мүмкіндігін ұсыну», — дейді Рамай Курбангалиев.
2026 жылы Freedom Life ӨСК клиенттердің өзгермелі қажеттіліктері мен жаһандық трендтерді ескере отырып, өнім желісін кеңейтуді жалғастырады. Негізгі бағыттардың бірі — unit-linked форматындағы инвестициялық сақтандыруды іске қосу және ілгерілету болмақ. Халықаралық зерттеулерге сәйкес, unit-linked жаһандық нарығы қазірдің өзінде 896 млрд доллардан асып, 2033 жылға қарай 2,5 трлн доллардан да жоғары деңгейге жетуі мүмкін. Бұл сақтандыру қорғанысын инвестициямен біріктіретін өнімдерге деген тұрақты қызығушылықты растайды.
«Қазақстан нарығы үшін де бұл бағыт барған сайын өзекті болуда. Клиенттер жинақтарды басқаруға, тәуекелдерді әртараптандыруға және классикалық жинақтаушы өнімдерге қарағанда әлеуетті түрде жоғары табыс алуға мүмкіндік беретін икемді шешімдерге қызығушылық танытуда. Сондықтан Freedom Life жақын болашақта unit-linked форматындағы бағдарламаларды танымал етуге басымдық береді», — деп бөліседі Freedom Life ӨСК басшысы.
Цифрландыру
«Бүгінде сақтандыру компаниялары сақтандыру полистерін онлайн рәсімдеуге, өздерінің мобильді қосымшаларын енгізуге белсенді түрде көшіп жатыр, сондай-ақ цифрлық арналар арқылы сатуды автоматтандыру үшін банктік сервистермен тығыз интеграциялануда. Мұны цифрлық интерфейстер арқылы жасалатын шарттар санының артуы мен қолжетімділіктің ыңғайлылығы арқасында клиенттік базаның кеңеюі дәлелдейді», — дейді Талғат Дүйсебаев.
Ішкі процестерге келсек, BCC Life сақтандыру компанияларында қызмет көрсетуді автоматтандыру деңгейінің айтарлықтай артқанын атап өтеді: CRM-жүйелерін енгізу, сақтандыру сыйлықақыларын автоматты есептеу, электрондық қолтаңбалар мен чат-боттарды пайдалану кеңеюде. Бұл алдағы жылдарға арналған негізгі нарықтық тренд ретінде қабылдануда.
«Сақтандыру компанияларына өздерінің цифрландыруымен белсендірек айналысуға рұқсат берілді. Енді олар сақтандыру және қаржылық қызметті автоматтандыруға арналған бағдарламалық қамтамасыз етуді өздері әзірлеп, енгізіп және қолдай алады. Сонымен қатар, мұндай әзірлемелерге маманданған немесе жасанды интеллект пен блокчейнге негізделген қызметтер ұсынатын IT-компанияларды (оның ішінде шетелдік) құруға немесе оларға инвестиция салуға құқық берілді», — деп хабарлайды Nomad Life ӨСК.
Келесі жылы Freedom Life ӨСК клиенттік сервистің технологиялық құрамдас бөлігін күшейтуді жалғастырады. Әсіресе Freedom Keleshek (МЖБЖ аясындағы білімге жинақтауға арналған ЖӨС бағдарламасы) және зейнетақы аннуитеті сияқты танымал бағдарламаларды жеке келу мен қағаз рәсімдерінсіз, толықтай онлайн форматта рәсімдеуге ерекше көңіл бөлінеді.
«Сондай-ақ компания деректерді және клиенттердің мінез-құлқын талдауға негізделген жекелендірілген цифрлық шешімдерді дамытады. Мұндай тәсіл ұсыныстарды дәлірек іріктеуге және өзара әрекеттесуді анағұрлым ыңғайлы әрі дара етуге мүмкіндік береді. Сонымен қатар Freedom Life қызмет көрсетуді автоматтандыруды және қағаз құжат айналымынан бас тартуды жалғастырады. Өтініштерді өңдеуді жеделдетіп, консультациялар сапасын арттыруда ЖИ-құралдар да маңызды рөл атқарады», — деп сенімді Азамат Ердесов.
“Еуразия” ӨСК сақтандыру ұйымының ақпараттық жүйесін мемлекеттік сервистермен неғұрлым тығыз интеграциялауға назар аударады. Бұл қағаз құжат айналымын толықтай алып тастап, клиенттің дербес деректерін жинау мен өңдеуге байланысты формальды рәсімдерге кететін уақытты барынша қысқартуға мүмкіндік береді.
«Дистрибуцияны ұйымдастыру тұрғысынан “Еуразия” ӨСК-де сату менеджерлеріне арналған лидогенерация рәсімдері мен әлеуетті клиенттің сату воронкасы кезеңдерінен өтуіне байланысты процестерді оңтайландыру тұрақты түрде жетілдіріліп келеді. Бүгінде біздің сатушылар барлық операциялық қызметті мобильді құрылғылар арқылы жүзеге асырады, жалғыз талап — интернетке қолжетімділіктің болуы», — деп қорытындылайды қаржы құрылымының өкілі.
Осылайша, еліміздегі өмірді сақтандыру нарығы 2026 жылға өршіл жоспарлармен қадам басуда: сақтандырушылар цифрлық сервистерді дамытуға, unit-linked өнімдерін танымал етуге және клиентке бағдарлануды күшейтуге басымдық беріп отыр. Негізгі драйверлер ретінде мемлекеттік бағдарламалар, төлемдерге берілетін кеңейтілген кепілдіктер және қорғау мен жинақтауды біріктіретін құралдарға деген өсіп келе жатқан сұраныс сақталуда.
Фото ашық дереккөздерден алынды
