ДПВ есебінен зейнетақы төлемдерінің өтінішсіз тәртібі (жинақтар болған жағдайда) мыналарды көздейді:
– зейнет жасына жетуіне байланысты мемлекеттік бюджеттен төленетін зейнетақыны, сондай-ақ міндетті зейнетақы жарналары (МЗЖ) және (немесе) міндетті кәсіптік зейнетақы жарналары (МКЗЖ) есебінен төлемдерді алу үшін белгіленген тәртіппен Мемлекеттік корпорацияға өтініш берген кезде БЖЗҚ тарапынан ДПВ есебінен төлемдерді автоматты түрде тағайындау;
– халықты әлеуметтік қорғау саласындағы уәкілетті органның ақпараттық жүйесінде көрсетілген тұлғаларға бюджет қаражаты есебінен жасына байланысты зейнетақы төлемдері және (немесе) мемлекеттік базалық зейнетақы төлемі тағайындалғанын жыл сайын Мемлекеттік корпорациямен салыстыру нәтижелері бойынша проактивті қызмет шеңберінде ДПВ есебінен төлемдерді жүзеге асыру.
Өтінішсіз тәртіп зейнет жасына жеткен тұлғаларға қатысты БЖЗҚ-дан төленетін зейнетақы төлемдеріне бірыңғай тәсіл қалыптастыру мақсатында енгізілді. Бұл жаңашылдық ДПВ есебінен төлемдерді оңтайландырып, жалпыға белгіленген зейнет жасына жеткен, бірақ бұрын елу жасқа толуына немесе мүгедектігіне байланысты БЖЗҚ-ға жүгінбеген тұлғалардың жинақтарының талап етілмей қалу қаупін жояды.
ДПВ есебінен зейнетақы төлемдері мынадай тәртіппен жүзеге асырылады: егер ДПВ есебінен зейнетақы жинақтарының сомасы тиісті қаржы жылының 1 қаңтарындағы жағдай бойынша республикалық бюджет туралы заңда белгіленген ең төменгі зейнетақының он екі еселенген мөлшерінен аспаса (2026 жылы – 828 588 теңге (12 × 69 049)), онда төлем біржолғы түрде жүргізіледі. Ал көрсетілген сомадан асқан жағдайда, төлемдер міндетті жарналар есебінен төлемдермен бірге ай сайынғы кесте бойынша жинақтар таусылғанға дейін төленеді. Сонымен қатар алушы ДПВ есебінен төлем шарттарын өзгерту туралы өтінішпен БЖЗҚ-ға жүгіне алады.
Естеріңізге сала кетейік, елу жасқа толған немесе мүгедектігі бар тұлғалар ДПВ есебінен төлем алу үшін БЖЗҚ-ның сайтындағы жеке кабинет арқылы, мобильді қосымшада немесе Қордың кеңсесінде өтініш бере алады.
Фото ашық дереккөздерден алынған
