Бағдарламаның негізгі мақсаты — сақтандыру секторының ұлттық экономикаға қосатын үлесін күшейту, әсіресе бүгінгі күні тәуекелдер мен қаржылық міндеттемелердің едәуір бөлігі мемлекетке жүктелген салаларда. Бұл үдерісте шешуші рөлді дәл өмірді сақтандыру атқаруы тиіс.
Жинақтаушы және инвестициялық сақтандыру — назарда
2026 жылға арналған қадағалау саясатының басымдықтарының қатарында реттеуші жинақтаушы және инвестициялық сақтандыруды дамытуды нақты атап өтті. Сонымен қатар міндетті сақтандыру түрлерін кеңейту, саланы цифрлық трансформациялау, лицензиялау рәсімдерін жеңілдету және сақтандыру нарығының инфрақұрылымын жетілдіру жоспарлануда.
Өмірді сақтандыру сегментіне ерекше көңіл бөлінуі кездейсоқ емес: дәл осы жинақтаушы бағдарламалар экономика үшін ұзақ мерзімді ресурстар қалыптастыруға мүмкіндік береді, сондай-ақ халыққа сақтандыру қорғанысымен қатар қаражатты сақтау және көбейту құралын ұсынады.
Қойылған міндеттерді іске асыру үшін ҚНРДА Халықаралық сақтандыру қадағалаушылары қауымдастығының (Insurance Core Principles) қағидаттарына, Solvency II директивасының талаптарына және ХҚЕС 17 стандартына негізделген жаңа интеграцияланған қадағалау моделін енгізуді жоспарлап отыр. Бұл саланы реттеуді үздік әлемдік тәжірибеге сәйкестендіруге мүмкіндік береді.
Тәуекелдерді бағалау жүйесі SRES шеңберінде сақтандыру ұйымдарының қызметіне жыл сайын талдау жүргізілетін болады. Бұл ретте алғаш рет бағалау кезінде тұтынушылардың шағымдары маңызды факторға айналады, бұл клиенттердің құқықтарын қорғауды, оның ішінде өмірді сақтандыру полистерін сатып алушылар үшін де, күшейтеді.
Жаңа Салық кодексінің қабылдануына байланысты ҚНРДА-ға ХҚЕС 17 талаптарына сәйкес сақтандыру міндеттемелерін бағалау мен құрылымына қойылатын талаптарды бекіту бойынша қосымша өкілеттіктер берілді. 2026 жылы алғаш рет сақтандыру компанияларының әдістемелерінің белгіленген талаптарға сәйкестігі және олардың міндеттемелерді автоматтандырылған бағалауға көшуге дайындығы талданады.
Бұл жинақтаушы бағдарламалар бойынша ұзақ мерзімді резервтер қалыптастыратын өмірді сақтандыру компанияларына тікелей қатысты: олардың міндеттемелерін дәл әрі ашық бағалау қаржылық тұрақтылықты қамтамасыз ету және клиенттер алдындағы міндеттемелерді орындау үшін аса маңызды.
Тұтынушыларды қорғау
Қадағалау саясатының жеке бір бөлігі мінез-құлықтық қадағалау мен тұтынушылардың құқықтарын қорғауға арналған. Мониторинг үшін сақтандыру ұйымына қатысты шағымдардың жол берілетін деңгейінің жаңа индикаторлары және сақтандыру сыйлықақылары мен төлемдері арасындағы теңгерімсіздік көрсеткіштері қолданылатын болады. Бұл, соның ішінде ұзақ мерзімді өмірді сақтандыру сияқты сезімтал сегментте, клиенттерге қызмет көрсету сапасын арттыруға тиіс.
Реттеушінің бағалауынша, аталған шараларды іске асыру нарық қатысушыларын бақылауды күшейтіп, сақтандыру секторының Қазақстанның қаржы жүйесіндегі рөлін арттырады, ал азаматтар үшін өмірді сақтандыруды ұзақ мерзімді жоспарлаудың сенімді, ашық әрі тартымды құралына айналдырады.
Фото ашық дереккөздерден
