Сақтандырудың бұл түрі жазатайым оқиға немесе ауру салдарынан қарыз алушының қайтыс болуын, I немесе II топтағы мүгедектіктің белгіленуін, сондай-ақ мүгедектік тобы тағайындала отырып еңбекке қабілеттіліктен айырылуды қамтиды. Сондықтан ипотекалық несие рәсімдеу кезінде банктер қарыз алушыларға өмірі мен еңбекке қабілеттілігін сақтандыруды жиі ұсынады.
Қарыз алушы қайтыс болған немесе еңбекке қабілеттілігін толық жоғалтқан жағдайда сақтандыру компаниясы банк алдындағы несиенің қалған берешегін өтейді. Ал уақытша еңбекке жарамсыздық кезінде (мысалы, ауру салдарынан) сақтандыру компаниясы сауыққанға дейінгі кезеңде несие бойынша ай сайынғы төлемдерді өтеуі мүмкін.
Қарыз алушы үшін негізгі артықшылық – жақындарының қаржылық қауіпсіздігін қамтамасыз ету. Сақтандыру жағдайы орын алған кезде төленетін сақтандыру төлемі отбасының тұрғын үйді өз меншігінде сақтап қалуына және қосымша қарыз жүктемесінен сақтануына мүмкіндік береді.
Сонымен қатар сақтандыру шартын жасамас бұрын оның барлық талаптарымен, әсіресе сақтандыру төлемі жүргізілмейтін ерекшеліктердің (алып тастаулардың) тізімімен мұқият танысу маңызды.
Егер сақтандыру болмаса немесе сақтандыру төлемінен бас тартылса, ипотекаға не болады?
Егер қарыз алушының өмірін сақтандыру шарты болмаса немесе сақтандыру компаниясы төлем жасаудан бас тартса (мысалы, сақтандыру оқиғасы шартта көзделген алып тастауларға жататын болса), онда ипотека бойынша міндеттемелер автоматты түрде тоқтатылмайды.
Мұндай жағдайда қарыз мұра құрамына енгізіледі, ал мұраны қабылдаған мұрагерлер мұраға қалған мүліктің құны шегінде мұра қалдырушының берешегі бойынша жауапты болады.
Маңызды: Қарыз алушының өмірін сақтандыру – ерікті сақтандыру түрі. «Қазақстан Республикасындағы банктер және банк қызметі туралы» Заңға сәйкес банк бұл қызметті міндеттей алмайды немесе оны несие алудың міндетті шарты ретінде белгілей алмайды.
Фото ашық дереккөздерден алынды.
