Медициналық көмекке жүгіну ықтималдығы мен жиілігіне әсер ететін негізгі фактор — 18 жасқа дейінгі балалар мен жасөспірімдердің болуы. Мұндай өтініштер компанияға түскен барлық өтініштердің шамамен 40%-ын құрайды. Ал сақтандырылғандардың ішінде балалардың үлесі небәрі 8%. Сарапшылардың айтуынша, балалар сапар кезінде акклиматизация, күн тәртібінің өзгеруі және демалыс кезіндегі жоғары белсенділік салдарынан медициналық көмекке жиі мұқтаж болады. Сондықтан отбасылық сапарларда балаларға арналған кеңейтілген сервисті және сүйемелдеуді қарастыратын сақтандыру бағдарламаларын таңдау аса маңызды, деп атап өтті КАПИТАЛ LIFE компаниясы.
Әдетте сақтандыру компаниясына жүгіну ықтималдығы жас ұлғайған сайын артады деген пікір бар. Алайда өтініштерді талдау бұл әрдайым дәл келе бермейтінін көрсетті. КАПИТАЛ LIFE компаниясында 18–30 жас аралығындағы және 45–60 жас аралығындағы сақтандырылғандардың саны шамалас болғанымен, жас топтан түскен өтініштер шамамен 1,5 есе көп. Бұл белсенді демалыс форматы, түрлі спорт түрлерімен айналысу, дербес саяхат бағыттарын таңдау және жалпы жоғары мобильділік сияқты факторлармен байланысты. Сондықтан жастарға арналған сақтандыру полистерін таңдағанда белсенді демалысқа қатысты және базалық бағдарламаларға кірмейтін қосымша кеңейтулерді қарастыру маңызды.
Сондай-ақ әйелдер сапар кезінде өзін нашар сезінуге жиі ұшырап, ерлерге қарағанда медициналық көмек алу үшін сақтандыру компаниясына тезірек жүгінеді деген болжам да расталмады. Талдау көрсеткендей, көмекке жүгіну ықтималдығы жынысқа байланысты емес. Әйелдерден түскен өтініштер – 61%, ал ерлерден – 39%. Дегенмен бастапқыда сақтандырылған әйелдердің саны ерлерге қарағанда шамамен 1,5 есе көп, өйткені әйелдер жалпы алғанда тәуекелдерге жауапкершілікпен қарайды және өздері үшін де, отбасы мүшелері үшін де сақтандыру полисін алуды жөн көреді.
Сақтандыру бойынша медициналық көмекке жүгіну статистикасын зодиак белгілері бойынша талдау да қызықты нәтижелер көрсетті. Шетелдік сапар кезінде медициналық көмекке ең жиі Таразы және Шаян жұлдыз белгілерінде туған туристер жүгінген. Одан кейінгі орындарда Суқұйғыштар мен Егіздер тұр. Сарапшылар мұндай айырмашылықтың нақты себептерін біржақты түсіндіре алмады. Дегенмен, медициналық көмекке ең аз жүгінетін белгі – Арыстан болғанымен, олардың да кейде медициналық көмекке мұқтаж болатынын атап өтті. Ал сақтандыру полисінің болуы адам қай жұлдыз белгісінде туғанына қарамастан өзін қауіпсіз сезінуге мүмкіндік береді.
«Біз клиенттеріміздің саяхаттарын әртүрлі қырынан талдауға қызығушылық танытамыз. Бұл олардың сақтандыру қорғанысын күшейту үшін жаңа мүмкіндіктерді табуға көмектеседі. Сақтандыру жағдайларының құрғақ статистикасының артында әрқашан нақты эмоциялар, медициналық диагноздар, бұзылған жоспарлар, жедел көмекке деген қажеттілік және оның салдарымен жұмыс істеу тұрады. Жасына, жынысына немесе жұлдыз белгісіне қарамастан, адамдар үшін сапар кезінде өздері мен жақындарының қауіпсіздігіне сенімді болу маңызды. Сақтандыру компаниясының міндеті – дәл осы қорғаныс сезімін қалыптастыру. Бұл адамдарға сапардан алаңсыз ләззат алуға мүмкіндік береді, ал қажет болған жағдайда біз әрдайым жедел көмек көрсетуге дайынбыз», – деді КАПИТАЛ LIFE компаниясының саяхатшыларды сақтандыру бағытының жетекшісі Маргарита Мармер.
Ашық дереккөздерден алынған фото
