Мұрагерлер қайтыс болған адамның мүлкін ғана емес, оның банк алдындағы міндеттемелерін де қабылдайды. Алайда олар қарызды өздеріне мұра ретінде өткен мүліктің құны шегінде ғана өтеуге міндетті.
«Қазақстан Республикасы Азаматтық кодексінің 1081-бабының 1-тармағына сәйкес мұра қалдырушының кредиторлары оның міндеттемелерінен туындайтын талаптарын өсиетті орындаушыға (мұраның сенімгерлік басқарушысына) немесе мұрагерлерге қоюға құқылы. Мұра қабылданғаннан кейін мұрагерлер мұра қалдырушының борыштары бойынша ортақ борышкерлер ретінде жауап береді. Бұл ретте әрбір мұрагердің жауапкершілігі өзіне мұрагерлік тәртібімен өткен мүліктің құнымен шектеледі», — деп түсіндірді ҚР ҚНРДА.
Ведомствоның мәліметінше, қарыз алушы қайтыс болғаннан кейін тұрғын үй кепілі де сақталады. Бұл пәтер немесе үй несие толық өтелгенге дейін ипотекада қала береді дегенді білдіреді.
Егер мұрагерлер болмаса немесе олардың барлығы мұрадан бас тартса, мүлік мемлекет меншігіне өтеді. Алайда бұл жағдайда да кредиттік міндеттемелер тоқтатылмайды, ал кредитор өз талаптарын қою құқығын сақтайды.
Заңға сәйкес мұраны қабылдау мерзімі – алты ай. Осы кезеңде банк мұрагерлер анықталғанға дейін мерзімі өткен берешек бойынша сыйақыны, айыппұлдар мен өсімпұлдарды есептемеу мүмкіндігін қарастыруы тиіс. Мұра қабылданғаннан кейін ипотека бойынша төлемдер бұрынғы талаптармен жалғасады. Сонымен қатар қарыз алушының қайтыс болуы өздігінен банкке несиені мерзімінен бұрын өтеуді талап ету құқығын бермейді.
Егер қарыз алушының өмірді сақтандыру полисі рәсімделіп, оның қайтыс болуы сақтандыру жағдайы деп танылса, банк алдындағы қалған берешекті сақтандыру компаниясы өтей алады. Ал сақтандыру болмаған немесе сақтандыру компаниясы төлем жасаудан бас тартқан жағдайда ипотека бойынша міндеттемелер мұрагерлерге өтеді.
ҚР ҚНРДА сондай-ақ несие рәсімдеу кезінде өмірді сақтандыру ерікті түрде жүзеге асырылатынын еске салды. Сондықтан банк оны міндетті шарт ретінде талап етуге құқылы емес.
Дереккөз: https://newtimes.kz/obshchestvo/220380-umer-zaemshchik-kto-teper-budet-platit-ipoteku-v-kazakhstane
Фото: ашық дереккөздерден.
