Болжам — «Тұрақты».
Жарияланған баспасөз хабарламасында агенттік сарапшылары Freedom Life негізгі өнімдер бойынша нарықтағы позициясын нығайтып, жоғары табыс көрсеткіштерін көрсеткенін және бизнесін әртараптандырғанын атап өтті. Компания жеткілікті капитал деңгейін сақтап, тұрақты операциялық нәтижелерге қол жеткізді. Агенттіктің пікірінше, дәл осы бәсекеге қабілеттіліктің артуы компанияның бизнес-тәуекелдер профилін тұрақтандырды.
Агенттік рейтингтің көтерілуі соңғы жылдары Freedom Life-тың нарықтағы үлесі мен табыстылығының тұрақты өсімін көрсететінін атап өтті. Компания Қазақстан Республикасында өмірді сақтандыру бойынша үшінші ірі компания ретінде өз позициясын нығайтты, жоғары рейтингке ие бәсекелестермен айырмашылықты айтарлықтай қысқартты және шағын компаниялардан едәуір алға шықты.
S&P деректері бойынша, Freedom Life-тың сақтандыру резервтері көлемі бойынша нарық үлесі 2021 жылғы 1 қаңтардағы 6,7%-дан 2025 жылғы 1 шілдеде 13,3%-ға дейін өсті. Ал компанияның жалпы жазылған сақтандыру сыйлықақылары бойынша үлесі 2020 жылғы 9%-дан 2025 жылғы 1 қыркүйектегі жағдай бойынша 24,8%-ға дейін артты.
S&P Global Ratings:
«2024 жылы сақтандыру табысының органикалық өсімі 186%-ды құрады — 49,5 млрд теңгеден 140,6 млрд теңгеге дейін — бұл Freedom Life көрсеткіштерін нарық көшбасшыларына жақындатты. Өсім зейнетақы аннуитеттері мен өмірді сақтандыру бағдарламалары үлесінің артуымен қамтамасыз етілді. S&P компанияның 2025–2026 жылдары активтердің рентабельдігін 5–6%-дан жоғары, ал капиталдың рентабельдігін 20%-дан артық деңгейде сақтайтынын болжайды».
Агенттікте сондай-ақ Freedom Life капиталы 99,99% ықтималдықпен шығындарды жабуға жеткілікті болатынын ерекше атап өтті. Тұрақты табыстылық, жоғары бөлінбеген пайда және консервативті инвестициялық саясат капитал жеткіліктілігін әрі қарай қолдайды.
S&P мәліметінше, Freedom Life-тың төлем қабілеттілігінің нормативтік маржасы 2025 жылғы қыркүйектегі жағдай бойынша жоғары деңгейде қалды — ең төменгі талап етілетін 1x көрсеткішінде 3,0x болды. IFRS 17 стандарты бойынша сақтандырушы капиталы 2024 жылғы 47,3 млрд теңгеден 2025 жылы 57,4 млрд теңгеге дейін өсті.
«Біз халықаралық ауқымда капиталдың абсолюттік көлемін әлі де шағын деп есептейміз, сондай-ақ компанияның капиталды жоспарлау және IFRS 17 аясында CSM қолданудағы тәжірибесінің шектеулі екенін атап өтеміз. Бұл Freedom Life капиталы мен табыстылығының жалпы бағасын «күшті» деңгейімен шектейді», — деп түсіндірді агенттік сарапшылары.
Сонымен қатар агенттік Freedom Life-ты Freedom Holding Corp. (FRHC) құрамындағы стратегиялық тұрғыда маңызды еншілес компания ретінде қарастыруды жалғастыруда. Сақтандыру компаниясы топтың ұзақмерзімді әртараптандыру стратегиясын жүзеге асыруда маңызды рөл атқарады. Freedom Life топ активтерінің 4%-ын және капиталының 8%-ын құрағанына қарамастан, сарапшылар оны қатаң реттеуші бақылау мен операциялық тәуелсіздікке байланысты дербес ұйым ретінде бағалайды.
«Тұрақты» болжам сарапшылардың алдағы 12 айда компания нығайған позициясын сақтап, тұрақты табыстылықты қамтамасыз етеді және корпоративтік басқарудың тиімді жүйесін жалғастырады деген күтілімін көрсетеді.
Азамат Ердесов, «Freedom Life» ӨСК» АҚ Басқарма төрағасы: «Рейтингтің «BB+» деңгейіне дейін көтерілуі — біздің компанияның тұрақтылығы мен серпінді дамуының маңызды мойындалуы. Соңғы жылдары Freedom Life өмірді сақтандыру нарығындағы позициясын айтарлықтай күшейтіп, жаңа өнімдерді енгізді, зейнетақы аннуитеттері үлесін кеңейтті және қаржылық сауаттылық, білім, спорт пен мәдениет саласында бірқатар әлеуметтік бастамаларды іске қосты. Біз инновациялық шешімдерді дамыту, клиенттерге қызмет көрсетудің сапасын арттыру және Қазақстанда өмірді сақтандыруға деген сенімді нығайту бағытындағы жұмысымызды жалғастырамыз».
