Жаңа заңнаманың ықпалымен Ұлыбританиядағы DC-провайдерлер бұрын-соңды болмаған қысымға ұшырап отыр. Заңға сәйкес, 2030 жылға қарай негізгі көпсалалы зейнетақы жинақтау схемаларының басқаруындағы активтер көлемі кемінде 25 млрд фунт стерлингке жетуі тиіс. Бұл 5–15 млрд фунт стерлинг көлеміндегі активтері бар жүздеген шағын және орта ойыншыларды бірігуге немесе өз бизнесіне сатып алушы іздеуге мәжбүрлейді.
Сарапшылардың болжамынша, 2035 жылға қарай нарықта 20-дан аспайтын ірі суперқор ғана қалады. Нарықта қалуды жоспарлаған сақтандырушылар шекті көрсеткішке жету стратегиясын қазірден бастап әзірлеуі қажет. Бұл елеулі операциялық күш-жігерді талап етеді және реттеушіні FCA/PRA-дан Зейнетақы реттеушісіне ауыстыруға әкелуі мүмкін.
Шоғырландыру үдерісімен қатар компаниялар жалпы ұсынымдар мен жеке қаржылық кеңес арасындағы алшақтықты жоюға бағытталған Targeted Support (TS) — нысаналы қолдау жүйесін енгізуге міндетті. TS ұқсас сипаттамалары бар клиенттер топтарына ұсынымдар беруге мүмкіндік береді. Бұл сақтандырушылардан үлкен көлемдегі деректерді жинау мен талдауды, жаңа өнімдер мен процестерді әзірлеуді талап етеді.
Алғашқы TS ұсыныстары 2026 жылдың сәуірінде пайда болады деп күтілуде. Бұл бағыттағы табыс компаниялардың клиенттерді дұрыс сегменттей алуына және олармен өзара іс-қимылды цифрландыру қабілетіне байланысты болады.
Сақтандырушылар корпоративтік зейнетақы схемаларының міндеттемелерін сатып алатын аннуитеттерді көтерме сатып алу нарығы (BPA) «қызу» күйінде қалып отыр. Мәмілелер көлемі жылына шамамен 40 млрд фунт деңгейінде тұрақты сақталуда. Жоғары пайыздық мөлшерлемелер мен Solvency UK реттеуінің ырықтандырылуы жаңа ойыншыларды, соның ішінде тікелей инвестиция қорларын тартып, бәсекелестікті күшейтуде.
2026 жыл Ұлыбританияның зейнетақы нарығы үшін бетбұрыс кезең болмақ. DC-сегментте M&A арқылы агрессивті өсуді немесе BPA нарығындағы күрделі мәмілелер үшін бәсекені көздейтін стратегиялық пайымды мінсіз операциялық орындаумен және реттеуші органдармен тұрақты диалогқа дайындықпен ұштастыра алған ойыншылар ғана өміршең әрі табысты болады. Бұл жарыста технологиялар мен деректер шешуші активке айналады.
Дереккөз: https://www.deloitte.com/uk/en/Industries/financial-services/research/regulatory-outlook/life-insurance.html
Фото ашық дереккөздерден алынған.
