Оқиға 16 шілдеде болған. Хакер компания пайдаланатын үшінші тараптың бұлттық жүйесін бұзып кірген. Allianz Life өкілдері өздерінің ішкі жүйелері бұзылмағанын, шабуыл тек сыртқы платформаны қамтығанын мәлімдеді.
Компания мәліметінше, қаскүнем әлеуметтік инженерия әдісін қолданған. «Зиянкестер Allianz Life клиенттерінің, қаржы мамандары мен кейбір қызметкерлерінің жеке деректеріне қол жеткізді», – делінген компанияның ресми хабарламасында.
Компания оқиғаны дереу бақылауға алып, қауіптің таралуын тоқтату үшін шаралар қабылдаған. Сондай-ақ, ФБР мен басқа да реттеуші органдарға, соның ішінде Мэн штатының Бас прокуроры кеңсесіне хабарланған.
Қазір тергеу жалғасуда. Компания зардап шеккендерді хабардар ету процесін бастап кетті. Ресми құжаттарға сәйкес, бұзушылық 17 шілдеде – оқиғадан келесі күні анықталған. Барлық зардап шеккен тұлғаларға 24 ай мерзімге тегін кредиттік тарих мониторингі мен жеке деректерді қорғау қызметі ұсынылады.
Компания өкілі Бретт Вайнберг тергеу жалғасып жатқандықтан, бұзу тәсілінің егжей-тегжейін ашпаған. Оқиға тек АҚШ-тағы Allianz Life бөлімшесіне қатысты болған және Allianz SE халықаралық тобының басқа компанияларына әсер етпегені атап өтілді.
Миннеаполисте орналасқан Allianz Life Insurance Company of North America – немістің қаржы алыбы Allianz SE-нің еншілес компаниясы, АҚШ-та шамамен 2000 қызметкері бар.
Дереккөз: AP News
Фотосурет ашық дереккөздерден алынған.
