Fortune Global 500 рейтингінде 103-орында тұрған француздық сақтандырушы AXA активтері 10–50 млн гонконг доллары (шамамен 1,28–6,4 млн АҚШ доллары) аралығындағы клиенттерге арналған AXA Global Private платформасын таныстырды. Жаңа платформа өмірді сақтандыруды, капиталды басқаруды және мұрагерлікті жоспарлау қызметтерін біріктіреді. Дәстүрлі сақтандыру өнімдерінен бөлек, AXA Global Private ауқатты клиенттер арасында сұранысқа ие өнер туындыларын сақтандыру, ұрлау мен бопсалаудан қорғау, сондай-ақ отбасылық кеңселерге арналған сақтандыру қызметтерін ұсынады.
AXA Greater China компаниясының бас директоры әрі AXA Global Private жетекшісі Салли Ван пандемиядан кейін Гонконгқа Қытайдың материктік бөлігінен клиенттердің қайта оралғанын, алайда олардың жаппай нарық өкілдері емес, ауқатты адамдар болғанын атап өтті.
«Олар әртараптандыру мен қорғаныс құралдарын іздеді, әсіресе отбасылық бизнесті қорғау және мұрагерлікті жоспарлау мәселелерінде», – деді ол.
Ванның айтуынша, ауқатты отбасылар мұрагерлікті жоспарлау және салықтық тиімділікті арттыру үшін қатысу үлесі бар өмірді сақтандыру полистерін (participating life policies) жиі пайдаланады. Олар жалпы активтерінің 5%-дан 10%-ына дейінгі бөлігін сенімгерлік қор (trust) сияқты жұмыс істейтін сақтандыру келісімшарттарына орналастырады. Гонконгта сатылатын мұндай полистер әдетте АҚШ долларымен немесе гонконг долларымен рәсімделеді және Қытайда қол жеткізу қиындау болатын активтер кластарына инвестициялауға мүмкіндік береді.
Салли Ван сондай-ақ Қытайдың материктік бөлігінде трансшекаралық инвестицияларға қатысты бірқатар шектеулер енгізілгеніне қарамастан, AXA клиенттер тарапынан сұраныстың төмендеуін байқамағанын айтты. Компания әрдайым реттеуші талаптарға сәйкес жұмыс істейді және бұл шаралардың ықпалын шектеулі деп бағалайды. Қазіргі таңда Қытайдың материктік бөлігінен келген клиенттер AXA Hong Kong сақтандыру сыйлықақылары портфелінің шамамен жартысын құрайды.
Сарапшылардың пікірінше, Гонконгтағы әл-ауқаттың өсуі және оның әлемдегі ірі инвестициялық орталыққа айналуы бірнеше факторға байланысты. Олардың қатарында IPO нарығының белсенділігі, Қытайдан келетін капитал ағыны және Гонконгтың Қытай мен жаһандық нарықтарды байланыстыратын маңызды қаржы хабы ретіндегі мәртебесі бар.
Сонымен қатар, геосаяси шиеленістің күшеюі және Швейцарияның дәстүрлі бейтарап саясаттан алшақтауы (ресейлік және венесуэлалық активтердің бұғатталуы) ауқатты инвесторлардың «қауіпсіз айлақ» туралы түсінігін қайта қарауына әсер етті. Нәтижесінде көптеген клиенттер тұрақты құқықтық жүйені, капитал қозғалысының еркіндігін және ашық салықтық ортаны ұсынатын Гонконгты таңдауда.
AXA Гонконгты өзінің стратегиялық базасы ретінде пайдалануды жоспарлап отыр. Кейінірек платформаны Таяу Шығыс пен Орталық Азия нарықтарына кеңейту көзделген, себебі бұл өңірлерде де ауқатты азаматтар саны артып келеді.
Өткен жылы компанияның кірісі 6%-ға өсіп, 116 млрд еуроны құрады. Ал таза пайдасы 24%-ға артып, 9,7 млрд еуроға жетті. Бұған дейін AXA негізгі сақтандыру бизнесіне шоғырлану мақсатында AXA Investment Managers инвестициялық бөлімшесін BNP Paribas банкіне сатқан болатын.
AXA Global Private платформасы ауқатты клиенттерге арналған сақтандыру өнімдерінің кең ауқымын ұсынады. Оның ішінде дәстүрлі өмірді сақтандырумен қатар элиталық жылжымайтын мүлікті сақтандыру және цифрлық активтерге байланысты инвестициялық өмірді сақтандыру шешімдері де бар. Платформа негізінен капиталы 10–50 млн гонконг доллары көлеміндегі клиенттерге бағытталған.
Дереккөз: Fortune
Фото ашық дереккөздерден алынды.
