The Business Research Company зерттеуінің деректері бойынша, корпоративтік өмірді сақтандыру нарығы тұрақты даму кезеңін бастан өткеруде. 2024 жылы 919,85 млрд доллар болған нарық көлемі 2025 жылы 985,45 млрд долларға дейін ұлғаяды деп болжануда. Жылдық жиынтық өсім қарқыны (CAGR) 7,1% деңгейінде бағаланады.
Орта мерзімді перспективада өсім баяулауымен қатар жалғасады. 2029 жылға қарай жаһандық COLI нарығы 1,28 трлн долларға жетіп, 2025–2029 жылдар аралығындағы CAGR 6,8% болады деп күтілуде.
Нарықтың негізгі драйверлері
Корпоративтік өмірді сақтандыру компаниялар арасында көпфункционалдығымен танымал. Сарапшылардың пікірінше, өсімге әсер ететін басты факторлар мыналар:
-
бизнес үшін маңызды қызметкердің қайтыс болуы жағдайында қаржылық шығыннан қорғану;
-
сақтандыру полистерін корпоративтік қаржы резервтерін нығайту құралы ретінде пайдалану;
-
COLI жоғары басшылықты тарту және ұстап қалу мақсатындағы өтемақы пакеттерінің бөлігі болып табылады;
-
сақтандыру жоғары басшылық алдындағы қамтамасыз етілмеген зейнетақы міндеттемелерін қаржыландыру тетігі ретінде қолданылады.
Болашақта нарықтың өсуіне салықтық тиімді инвестиция құралы ретіндегі сақтандыруға деген сұраныстың артуы және корпоративтік жеңілдіктердің өзін-өзі қаржыландыратын бағдарламаларының кеңеюі ықпал етеді.
Саланың технологиялық трансформациясы
Қаржы секторларының көбі сияқты, COLI нарығы да белсенді цифрлануда. Дамуды айқындайтын негізгі үрдістер мыналар:
-
тәуекелдерді дәл бағалау және андеррайтинг процесін автоматтандыру үшін жасанды интеллект пен машиналық оқыту технологиялары;
-
полистер есебін жүргізудің ашық әрі қорғалған жүйелерін құруға арналған блокчейн шешімдері;
-
сақтандыру операцияларының икемділігі мен ауқымдылығын қамтамасыз ететін бұлтты платформалар;
-
клиенттерді тіркеу мен қызмет көрсетуді жеделдететін цифрлық сәйкестендіру құралдары.
Аймақтық көшбасшылар мен өсіп келе жатқан нарықтар
Қазіргі уақытта Солтүстік Америка корпоративтік өмірді сақтандыру нарығында жетекші орынға ие. Бұл өңірде корпоративтік сектор дамыған және қаржы инфрақұрылымы жетілген.
Дегенмен, алдағы жылдары жағдай өзгеруі мүмкін. Ең жоғары өсім қарқыны Азия-Тынық мұхиты өңірінде (APAC) күтілуде. Бұл аймақтағы қарқынды экономикалық даму, халықаралық корпорациялардың белсенділігі және жергілікті компаниялардың тәуекелдерді басқарудың маңызын жақсы түсіне бастауы негізгі факторларға айналмақ.
Дереккөз: Insurance Asia
Сурет ашық дереккөздерден алынған
