Зерттеу зейнет жасы мен адамдардың еңбек қызметін тоқтатуға нақты қаржылық дайындығы арасындағы алшақтықтың ұлғайып келе жатқанын көрсетті. Бұл үрдіс елеулі тәуекелдермен қатар, аймақтағы сақтандыру компаниялары үшін жаңа мүмкіндіктер де туындатады. Бүгінде әлемдегі 60 жастан асқан халықтың 60%-ы дәл осы Азия өңірінде тұрады.
Екі түрлі шындық
Sun Life сарапшылары болашақ зейнеткерлердің екі қарама-қарсы тобын бөліп көрсетеді. Бірінші топ — қаржылық тұрғыдан дайын адамдар. Олар зейнетке шығуды саналы түрде кейінге қалдырады, мысалы, белсенді өмір салтын сақтау немесе әлеуметтік байланыстарды үзбеу үшін.
Екінші, әрі анағұрлым ауқымды топ — жұмыс істеуді тоқтатуға қауқарсыз жандар. Олардың 52%-ы жеткілікті қаражат жинау үшін өздеріне көбірек уақыт қажет екенін мойындаған. Бұл жағдай Азиядағы сақтандыру және зейнетақы жоспарлау құралдарына қолжетімділіктің тең емес екенін айқын көрсетеді.
Зейнетке дайындыққа деген сенім деңгейі алаңдатарлықтай төмен. Сауалнамаға қатысқандардың тек 22%-ы ғана өз зейнетақы жоспарына толық сенімді екенін айтқан. Респонденттердің жартысына жуығы мүлде зейнетке шығуды жоспарламайды немесе бұл туралы небәрі екі жыл қалғанда ғана ойлана бастайды.
Сонымен қатар қаржылық кеңес алу арналары да өзгеріп жатыр. Банктер мен тәуелсіз қаржылық кеңесшілерге жүгіну үлесі тиісінше 35% және 34%-ға дейін азайған. Ал генеративті жасанды интеллект құралдарын қаржылық шешім қабылдауда қолданатындардың үлесі екі есеге жуық өсіп, 22%-ға жеткен. Sun Life сарапшылары мұны тәуекел деп бағалайды: тиісті сараптамасыз өз бетінше жоспарлау ұмтылысы орынсыз стратегия таңдауға және тәуекелдердің жеткіліксіз сақтандырылуына әкелуі мүмкін.
Зейнетке деген көзқарасқа әсер ететін негізгі фактор — денсаулық. Физикалық және психикалық жағдайдың жақсаруы адамдардың зейнетке шығуға деген көзқарасын оңтайландырады. Керісінше, мерзімінен бұрын зейнетке шыққандардың 32%-ы мұндай шешімді денсаулығының нашарлауына байланысты қабылдаған.
Sun Life компаниясында бұл зерттеу нәтижелері зейнетақы теңсіздігін шешуде сақтандыру индустриясының рөлі айрықша маңызды екенін көрсететінін атап өтті. Халықтың қартаюы мемлекеттік жүйелер мен жеке жинақтарға түсетін қысымды арттыра түсетіндіктен, сақтандырушылар кеңес беру қызметтері, қорғаныс өнімдері және өмір бойы кепілдендірілген табыс тетіктері арқылы тиімді шешімдер ұсына алады.
Дереккөз: insuranceasia.com
Фото ашық дереккөздерден
