Елестетіп көріңіз: сіз денсаулыққа қатысты ықтимал қауіптерді білу үшін генетикалық тест тапсырасыз. Кенеттен сізге сақтандыру рәсімдеу мүмкін болмай қалады. Тіпті әлі ауырмасаңыз да. Тек белгілі бір ауруларға бейімділігіңіз бар болғаны үшін.
WCNC Charlotte журналисі Мишель Буден бұл тақырыпқа құрбысымен сөйлескеннен кейін қызығушылық танытқан. Сүт безі обырын бастан өткерген Келли Кэшмер өмірді сақтандыру ала алмай жүргенін айтқан. Бұл Буден үшін күтпеген жаңалық болды. Кейін белгілі болғандай, сақтандырудан бас тарту үшін міндетті түрде ауру болу шарт емес — генетикалық тәуекелдерді білу жеткілікті.
«Жүз пайыз, — дейді ол. — Дәрігерім тесттер болмағанда, жарты жылдан кейін бәрі мүлде басқаша аяқталуы мүмкін еді деді».
Келли 31 жасында екі кішкентай баланың анасы болатын. Қарапайым өмір, күнделікті тіршілік. Гинеколог қабылдауында отбасы тарихында қатерлі ісік болғаны анықталады. Дәрігер генетикалық тест тапсыруды ұсынады. Нәтижесінде сүт безі мен аналық без обырының даму қаупі жоғары екені белгілі болады.
Келли қыздарын ойлап, өмірді сақтандыру рәсімдеуді шешеді. Бірақ сақтандыру компаниялары одан бас тартты. Себебі — генетикалық тест нәтижелері.
«Бұл түсініксіз әрі әділетсіз болды, — деп еске алады Келли. — Адам бәрін дұрыс жасағысы келеді: қауіптерді білгісі келеді, денсаулығына қамқор болғысы келеді. Ал соңында сол нәрсе өзіне кедергі болады. Адамдар сақтандырудан бас тартады немесе тарифтер қымбаттап кетеді деп қорқып, тест тапсырмайды. Бұл дұрыс емес».
Тест тапсырғаннан екі апта өткен соң Келли өзінде қатерлі ісік бар екенін біледі. Сол кезде ол ерте диагностика қаншалықты маңызды екенін түсінді. Он жылдан астам уақыт бұрын ол адамдарға генетикалық тесттер мен олардың салдарын түсіндіруге көмектесу үшін Nothing Pink атты коммерциялық емес ұйым құрды.
«Бұл генетикалық белгі бойынша кемсітуге ұқсайды», — дейді Келли.
Екі баланың анасы, сүт безі обырынан өткен тағы бір әйел — Мэг Робертсон да осы пікірмен толық келіседі. «Бұл ашуландырады, — дейді Мэг. — Мен тест тапсыруға барған кезде, бірден: “Сенімдісің бе? Алдымен құжаттарыңды реттеп ал. Кейін кеш болуы мүмкін” деді».
Бақытына қарай, Мэгтің сақтандыруы бұрыннан болған. Бірақ диагноз қойылғанына бес жыл өтсе де, оның полисінің мерзімі аяқталуға жақын. Оны бұрынғы шарттармен ұзарту мүмкін болмай отыр.
«Менің полисіме бір жарым жыл қалды, — деп түсіндіреді Мэг. — Ал қазір ұсынып отырған жаңа тарифтер өте қымбат. Негізі, мен сақтандырусыз қаламын».
Фото ашық дереккөздерден
